Við birtum upplýsingar um framboð Samfylkingarinnar í sveitarstjórnarkosningunum á þessari síðu: https://xs.is/sveitarstjornarkosningar-2026

Svo er hægt að finna ýmsar upplýsingar um sveitarstjórnarkosningar á heimasíðu landskjörstjórnar: https://island.is/s/landskjorstjorn/sveitarstjornarkosningar

Kosið verður til sveitarstjórna kjörtímabilið 2026-2030 laugardaginn 16. maí 2026.

Við hvetjum ykkur til að taka daginn frá. 
Dagskrá og nánari tímsetningar koma síðar. 

Við minnum á að ályktunartillögur fyrir reglulega flokkstjórnarfundi, sem aðrir flytja en stjórn eða framkvæmdastjórn, skulu hafa borist a.m.k. tveimur vikum fyrir boðaðan fund og skulu kynntar á heimasíðu flokksins og eftir föngum í viðeigandi málefnanefndum hans. Frestur til að skila inn tillögum er því t.o.m. 6. mars, og skulu þær sendar á samfylking@samfylking.is.  

Flokksstjórnarfundur fer fram laugardaginn 21. mars í Austurbæjarbíó við Snorrabraut 37, 105 Reykjavík. 

Aðalfundur Samfylkingarfélagsins í Reykjavík verður haldinn föstudaginn 20. febrúar kl. 17:00 í sal Samfylkingarinnar við Hallveigarstíg 1.

Kjör í nefndir a) uppstillingarnefnd b) í aðrar nefndir sem aðalfundur ákveður

Tillögur til lagabreytinga þurfa að hafa borist stjórn 2 vikum fyrir boðaðan aðalfund skv. 7. gr í netfangið samfylking@samfylking.is og skulu sendar út með öðrum fundargögnum minnst viku fyrir fund. Tillaga að lagabreytingum telst samþykkt fái hún 2/3 hluta greiddra atkvæða.

Á aðalfundi skal kjósa þriggja manna uppstillingarnefnd og einn til vara að tillögu fráfarandi stjórnar félagsins. Hlutverk nefndarinnar er að leggja fyrir aðalfund tillögur um frambjóðendur við kjör formanns, annarra stjórnarmanna, varamanna og skoðunarnefndarmanna. Tillögur uppstillingarnefndar skulu liggja fyrir á skrifstofu félagsins minnst viku fyrir aðalfund. Aðrar tillögur skulu berast skrifstofu félagsins minnst 2 sólarhringum fyrir boðaðan aðalfund í netfangið samfylking@samfylking.is.

Sé áhugi á framboði er hægt að hafa samaband við skrifstofu, samfylking@samfylking.is sem kemur skilaboðum áfram á uppstillinganefnd.

Í uppstillinganefnd sitja Ellen Calmon, Sara Björg Sigurðardóttir og Gunnar Alexander Ólafsson.

Hér er að finna lög Samfylkingarfélagsins í Reykjavík

Aðalfundur Samfylkingarfélagsins í Reykjavík

Landsamband 60+ innan Samfylkingarinnar, í samstarfi við stýrihóp Samfylkingarinnar um daglegt líf, boðar til málþings fimmtudaginn 12. febrúar 2026 kl. 13:00.

📍 Staður: Grand Hótel Reykjavík, Sigtúni
📍 Salur: Háteigur, 4. hæð
👥 Öll velkomnin á meðan húsrúm leyfir

Á málþinginu verður fjallað um málefni sem snerta daglegt líf fólks 60 ára og eldra, meðal annars fjárhag, réttindi, húsnæðismál, þjónustu sveitarfélaga, andlega líðan og hvernig gervigreind getur nýst 60+ í daglegu lífi.

Markmið málþingsins er að veita hagnýtar upplýsingar, skýr svör og skapa samtal um það sem skiptir raunverulega máli í daglegu lífi fólks 60+.

☕ Kaffi og veitingar í hléi
💬 Umræður og spurningar úr sal í lokin

Í umræðum málþingsins verður lögð áhersla á samtal og þátttöku gesta. Reynslu og sjónarmiðum sem þar koma fram verður safnað saman og þau nýtt áfram í starfi Samfylkingarinnar.

Athugið: Dagskrá er birt með fyrirvara um smávægilegar breytingar.

13:00–13:05
Setning málþings
Kristín Á. Guðmundsdóttir, formaður Landsambands 60+ innan Samfylkingarinnar

13:05–13:20
Ávarp
Kristrún Frostadóttir, forsætisráðherra

13:20–13:40
Fjárhagur einstaklinga 60+
Kolbeinn Stefánsson, dósent við Háskóla Íslands

13:40–14:00
Samþætting ríkis og sveitarfélaga
Alma Möller, heilbrigðisráðherra

14:00–14:20
Húsnæðismál og samfélagsleg réttindi aldraðra
Finnbjörn Á. Hermannsson, forseti ASÍ

14:45–15:05
Þjónusta sveitarfélaga við aldraða
og hvernig er að eldast í andanum
Berglind Magnúsdóttir, sálfræðingur og skrifstofustjóri öldrunarmála hjá Reykjavíkurborg

15:05–15:25
Gervigreind og hvernig hún getur nýst fólki 60+
Ólafur Kristjánsson, tölvukennari hjá Netkynningu

15:25–15:50
Umræður og spurningar úr sal
Samtal um daglegt líf 60+

Um er að ræða bindandi flokksval fyrir efstu fjögur sæti á framboðslista Samfylkingarinnar í Kópavogi, með svokölluðum paralista, þar sem jafnræði kynja er tryggt í hverjum tveimur sætum. Kosningin fer fram 7. febrúar 2026.

Kosningarétt hafa allir félagsmenn í Samfylkingunni með lögheimili í Kópavogi  sem hafa náð 16 ára aldri á valdegi og skráðir stuðningsmenn Samfylkingarinnar sem eru 16 ára og eldri og undirritað hafa stuðningsyfirlýsingu og skráð sig á kjörskrá innan lokafrests til skráningar.

Allar frekari upplýsingar og leiðbeiningar má finna á:
👉 https://xs.is/kopavogur

Miðvikudaginn 4. febrúar kl. 20:00 stendur Samfylkingin í Kópavogi fyrir pallborði í veislusal Gerplu, Versölum 3 með öllum frambjóðendum sem bjóða sig fram í flokksvali Samfylkingarinnar í Kópavogi.

Þar gefst kjörið tækifæri til að hitta frambjóðendur, kynnast áherslum þeirra og ræða helstu málefni í aðdragandi kosninga. 

Við hvetjum alla kjósendur til þess að mæta og kynna sér frambjóðendurna og eiga góða stund með okkur. 

Umræðustjóri er Margrét Tryggvadóttir, rithöfundur.

Samfylkingarfélagið í Reykjavík gengst í vetur fyrir spjallfundum um Ísland og Evrópusambandið, og eru haldnir stuttir fundir mánaðarlega með einum gesti eða tveimur.

Næsti fundur verður núna á miðvikudaginn, 4. febrúar, frá kl. 17 til um 18.30, á Hallveigarstíg 1, og er gestur okkar þá Finnbjörn Hermannsson, forseti Alþýðusambands Íslands.

Við spjöllum um fyrirheit ríkisstjórnarinnar í Evrópumálunum, um viðhorf til aðildar í verkalýðshreyfingunni og reynslu ASÍ af samvinnu alþýðusamtaka á evrópskum grundvelli.

Eftir mánuð, miðvikudaginn 4. mars, verður gestur okkar Þorsteinn Pálsson, fyrrverandi alþingismaður og ráðherra, en einnig er væntanleg í spjall til okkar seinna í febrúar Kristrún Frostadóttir, formaður Samfylkingarinnar og forsætisráðherra. Dagsetning er enn óákveðin.

Áður hafa spjallað við okkur Magnús Árni Skjöld, formaður Evrópuhreyfingarinnar, Þorgerður Katrín Gunnlaugsdóttir utanríkisráðherra og Dagur B. Eggertsson alþingismaður.

Þetta spjall um Evrópu er haft á lágu nótunum, fjarri kastljósi fjölmiðla, og er tilgangurinn bæði að fræðast og undirbúa sig fyrir atkvæðagreiðsluna um aðildarviðræður seinna á kjörtímabilinu.
Allir félagar velkomnir ‒ og takið með ykkur gesti!

Kaffispjall 60+ í Hafnarfirði 
Við bjóðum til kaffispjalls fimmtudaginn 29. janúar kl. 10:30.

Við ætlum að eiga samræður um sveitarstjórnarpólitíkina - hverju viljum við breyta og hvað er það sem gengur vel? Vonumst til að sjá ykkur sem flest og eiga góð samtöl um bæinn okkar.

Komdu í notalegt spjall og hlýja stemningu.
Heitt á könnunni og kruðerí á boðstólnum.
Öll hjartanlega velkomin! 

Opinn fundur með Kristrúnu Frostadóttur forsætisráðherra á Sauðárkróki. Verið velkomin á Kaffi Krók fimmtudaginn 29. janúar kl. 17:00.

Hvað brennur á þér? Hvernig gerum við Ísland betra? Hvað er framundan hjá ríkisstjórninni?

Tökum opið samtal. Beint og milliliðalaust. Heitt á könnunni.

Opinn fundur með Kristrúnu á Sauðárkróki

Ársþing 60+ í Reykjavík verður haldinn miðvikudaginn 28. janúar kl. 10-12 á Hallveigarstíg 1.

Dagskrá ársþing 60+ í Reykjavík:
1. Greinargerð um störf og framkvæmdir stjórnar á liðnum 2 árum.
2. Breytingar á samþykktum.
3. Kosning formanns.
4. Kosning fjögurra félagsmanna í aðalstjórn.
5. Kosning tveggja félagsmanna í varastjórn.
6. Kosning þriggja manna í uppstillingarnefnd.
7. Önnur mál.

Þeim sem vilja bjóða sig fram til stjórnarstarfa er bent á að hafa samband við formann uppstillingarnefndar, Ragnheiði Sigurjónsdóttur (s. 8994927).


Opinn fundur með Kristrúnu Frostadóttur forsætisráðherra í Hveragerði. Verið velkomin í Skyrgerðina, Breiðumörk 25 miðvikudaginn 28. janúar kl. 17:00.

Tökum opið samtal. Beint og milliliðalaust. Kaffi og kruðerí.

Opinn fundur með Kristrúnu í Hveragerði

Opinn fundur með Kristrúnu Frostadóttur forsætisráðherra á Seltjarnarnesi. Verið velkomin í Vivaldisalinn hjá knattspyrnufélaginu Gróttu miðvikudaginn 28. janúar kl. 20:00.

Opinn fundur með Kristrúnu á Seltjarnarnesi

Samfylkingarfélagið í Reykjanesbæ boðar til félagsfundar þann 27. janúar klukkan 19:30 á Park Inn hótelinu.

Á dagskrá fundarins verða sveitastjórnarkosningarnar, tillaga að lista Samfylkingarinnar í Reykjanesbæ frá uppstillingarnefnd auk annarra mála.

Heitt á könnunni og léttar veitingar í boði.

Sérstakir gestir eru Kristrún Frostadóttir forsætisráðherra og Víðir Reynisson þingmaður Suðurkjördæmis. 

🌹 Undirbúningur bæjarstjórnarkosninga í Árborg 🌹

Hittumst og ræðum málefni bæjarins og hverjir verða málsvarar okkar í kosningunum í vor.

📅 Laugardaginn 24. janúar kl. 11:00
👥 Allir íbúar Árborgar eru hjartanlega velkomnir.
☕ Kaffi og kruðerí í boði.

Laugardaginn 24. janúar komum við saman í Iðnó þegar niðurstöður flokksvals Samfylkingarinnar í Reykjavík verða kynntar.

Húsið opnar kl. 18:30
 Niðurstöður kynntar kl. 19:00
 Partýið stendur til kl. 01:00

Komdu og vertu með í þessari lýðræðislegu hátíð, fögnum saman niðurstöðunum og njótum kvöldsins í góðum félagsskap.

Úrslit flokksvals í Reykjavík og partý

Um er að ræða bindandi flokksval fyrir efstu sex sæti á framboðslista Samfylkingarinnar í Reykjavík, með svokölluðum paralista, þar sem jafnræði kynja er tryggt í hverjum tveimur sætum. Kosningin fer fram rafrænt þann 24. janúar 2026.

Kosningarétt hafa allir flokksfélagar (ekki stuðningsmenn) Samfylkingarinnar sem eiga lögheimili í Reykjavík og hafa náð 16 ára aldri. Frestur til að skrá sig inn í flokkinn til að geta tekið þátt í flokksvalinu var 22. janúar kl. 23:59. 

Flokksvalið fer fram rafrænt frá kl. 24:00 - 18:00 laugardaginn 24. janúar. Slóð á kjörseðil verður birtur hér og sendur út í tölvupósti á kjörskránna. 

Að lokinni rafrænni auðkenningu opnast kjörseðillinn.

Kjósandinn þarf að velja tungumál kjörseðils. Í boði eru íslenska, enska og pólska.

Raða skal frambjóðendum í sæti með því að velja tölu úr flettiglugga við nafn og mynd frambjóðandans.

Minnst skal raða fjórum frambjóðendum og mest sex á kjörseðlinum.

Hægt er að skila auðum seðli með því að velja „Skila auðu“.

Þegar búið er raða frambjóðendum í sæti er smellt á „Áfram“ hnapp.

Nú birtist staðfestingargluggi þar sem röð frambjóðenda birtist eins og hún var valin.

Með því að smella á „Kjósa“ happinn er valið staðfest, en einnig er hægt að fara til baka og endurraða valinu áður en valið er staðfest.

Hægt er að breyta vali á kjörseðli allt til klukkan 18:00 á kjördegi. Síðasta atkvæði telur.

Til þess að tryggja aðgengi að kosningunum verður kosningaaðstoð á Hallveigarstíg 1 á kjördegi frá kl. 10:00 - 18:00 sem og í síma skrifstofu flokksins, 414 2200 og í síma kjörstjórnar 661 6973. Boðið verður upp á lausn fyrir fólk sem ekki hefur rafræn skilríki til þess að kjósa í persónu í gegnum rafræna kosningakerfið.

Samfylkingarfélagið í Mosfellsbæ boðar til félagsfundar þar sem tekin verður ákvörðun um tilhögun á vali á framboðslista flokksins fyrir sveitarstjórnarkosningarnar 2026.

📅 Fimmtudaginn 22. janúar kl. 19:30
📍 Þverholt 3

Fundarstjóri:
Guðmundur Ari Sigurjónsson, þingflokksformaður Samfylkingarinnar

Stjórn Samfylkingarfélagsins í Mosfellsbæ leggur til að stillt verði upp á lista Samfylkingarinnar í Mosfellsbæ fyrir sveitarstjórnarkosningar 16. maí 2026.

Notast verði við paralista, þannig að kvenframbjóðandi skipi annaðhvort 1. eða 2. sæti og annaðhvort næstu tveggja sæta, og svo koll af kolli í hver tvö sæti.

Við hvetjum alla félagsmenn eindregið til að mæta og taka þátt í umræðu um tillögun og kosningarnar framundan.

Stjórn Samfylkingarfélagsins í Mosfellsbæ

Félagsfundur um sveitarstjórnarkosningarnar

Spjallkaffi 60+ verður á sínum stað miðvikudaginn 21. janúar kl. 10:00 - 12:00 í sal Samfylkingarinnar, Hallveigarstíg 1, 101 Reykjavík.

Gestur fundarins er Dr. Sigurbjörg Sigurgeirsdóttir og mun hún mun fjalla um nýútkomna “Skýrslu um embættismannakerfið”.

Það verður heitt á könnunni og eitthvað með því.

Verið öll velkomin!

Samfylkingin í Kópavogi efnir til hraðstefnumóts með frambjóðendum í flokksvali flokksins.

Miðvikudaginn 21. janúar kl. 18:00
Garðurinn Mathöll, Smáralind

Á hraðstefnumótinu gefst áhugasömum kostur á að spjalla stuttlega við hvern frambjóðanda, kynnast áherslum þeirra og ræða helstu málefni í aðdraganda kosninga.

Alls hafa sex einstaklingar gefið kost á sér til setu á framboðslista flokksins.

Frambjóðendur:
• Jónas Már Torfason, 1. sæti
• Gunnar Gylfason, 1.–4. sæti
• Eydís Inga Valsdóttir, 2. sæti
• Sólveig Skaftadóttir, 2.–3. sæti
• Hákon Gunnarsson, 3. sæti
• Hildur María Friðriksdóttir, 3.–4. sæti

Viltu taka þátt í að móta framtíð Seltjarnarness?

Samfylking og óháðir á Seltjarnarnesi bjóða til opins fundar í undirbúningi fyrir Bæjarstjórnarkosningar 16. maí 2026.

Fundurinn verður haldinn  miðvikudaginn  21. janúar, kl. 20:00 í vallarhúsinu við Gróttuvöll

Tillaga stjórnar um uppstillingu framboðslista lögð fram til samþykktar,

Tillaga um uppstillingarnefnd, skipaða að minnsta kosti þremur aðilum, konum og körlum á breiðum aldri, lögð fram til samþykktar.

Umræða um stöðu mála í bæjarstjórn og á Seltjarnarnesi almennt

Opið samtal um næstu skref og áherslur fram að kosningum

Framboðið verður í nafni Samfylkingarinnar, en fundurinn er opinn öllum sem hafa áhuga á að bæta Seltjarnarnes, óháð flokksaðild.
Við viljum sérstaklega hvetja fólk úr öðrum flokkum og óháða íbúa til að mæta, taka þátt í umræðunni og vinna með okkur.

fólki sem hefur áhuga á að bjóða sig fram,

fólki sem vill taka þátt í málefnavinnu fyrir kosningar

og fólki sem einfaldlega vill leggja sitt af mörkum til betra samfélags.

Skráning fer fram hér: https://forms.gle/QAh9xwXog7meazxW8

Sigurþóra Bergsdóttir, bæjarfulltrúi – 693 9367

 Árni Emil Bjarnason, formaður Samfylkingarinnar á Seltjarnarnesi – 821 1412

Undirbúningsfundur fyrir bæjarstjórnarkosningar

SffR efnir til umræðufundar um fátækt í Reykjavík mánudaginn 19. janúar kl. 19:30 í húsnæði Samfylkingarinnar að Hallveigarstíg 1.

Erindi flytja:
• Kristín Heba Gísladóttir, framkvæmdarstjóri Vörðu: Vinnandi fátæk - er fátækt meðal launafólks á Íslandi?
• Hildur Oddsdóttir einstæð móðir og öryrki, varaformaður EAPN á Íslandi og stofnandi og formaður Hjálparkokka
• Sabine Leskopf, borgarfulltrúi: Innflytjendur og fátækt
• Vilborg Oddsdóttir, félagsráðgjafi Hjálparstarfs kirkjunnar: Fátækt er pólitísk ákvörðun

Laugardaginn 17. janúar kl. 14:00-17:00 stendur Fulltrúaráð Samfylkingarinnar í Reykjavík fyrir pallborði í Iðnó með öllum frambjóðendum sem bjóða sig fram í flokksvali Samfylkingarinnar í Reykjavík.

Pallborð með frambjóðendum í Reykjavík

Við bjóðum til kaffispjalls fimmtudaginn 15. janúar kl. 10:30.

Gestur fundarins:
 Jóhann Páll Jóhannsson, umhverfis-, orku- og loftslagsráðherra

Komdu í notalegt spjall, hlýja stemningu og gott kaffihlé.
 Heitt á könnunni og kruðerí á boðstólnum.

Samfylkingin í Borgarbyggð býður ykkur velkomin á umræðufund um komandi sveitarstjórnarkosningar sem fara fram í maí. Fundurinn verður haldinn í húsnæði Símenntunarmiðstöðvar Vesturlands, Bjarnarbraut 8 - Borgarnesi, fimmtudaginn 15. janúar kl. 20. 

Gestur okkar á fundinum verður Arna Lára Jónsdóttir, fyrrverandi bæjarstjóri Ísafjarðar og núverandi þingmaður og formaður efnahags- og viðskiptanefndar.

Arna Lára hefur mikla reynslu og þekkingu á málefnum sveitarfélaga og verður því áhugavert að ræða við hana um komandi sveitarstjórnarkosningar.

Umræðufundur um sveitarstjórnarkosningar

🍻 Spjall og samvera með Katrínu – Ungu jafnaðarfólki á Kraganum 🍻

Katrín – Ungt jafnaðarfólk á Kraganum býður til óformlegs viðburðar á Rauða ljóninu
📅 Fimmtudaginn 15. janúar kl. 20:00

Komdu í bjór og spjall með
✨ Þórunni Sveinbjarnardóttur
✨ Sigurþóru Bergsdóttur
✨ Jónasi Má Torfasyni

Við ræðum lands- og sveitarstjórnarmál – og allt annað sem skiptir ungt fólk máli – í afslöppuðu og opnu samtali.

Við hvetjum allt ungt fólk til að mæta, taka þátt og eiga góða stund saman.
Öll velkomin! 🍻🌹

Spjallkaffi 60+ verður á sínum stað miðvikudaginn 14. janúar kl. 10:00 - 12:00 í sal Samfylkingarinnar, Hallveigarstíg 1, 101 Reykjavík.

Gestur fundarins er Indriði Þorláksson og mun hann ræða við okkur um skattamál. 

Samfylkingin á Vestfjörðum efnir til framhalds umræðufundar um komandi sveitarstjórnarkosningar. Fundurinn verður haldinn í Rögnvaldarsal í Edinborgarhúsinu þriðjudaginn 13. janúar kl. 20.

Fyrir fundinum liggur að taka ákvörðun um framboð Samfylkingarinnar á Vestfjörðum í sveitarstjórnarkosningunum sem fram fara 16. maí.

Við vonum að sem flest hafi tækifæri á að mæta og taka þátt.

Umræðufundur um sveitarstjórnarkosningar á Ísafirði

Hægt er að tilkynna fyrirhugað framboð til kjörstjórnar á netfangið xskopavogur2026@gmail.com, þar sem frambjóðendur fá nánari leiðbeiningar og þau gögn sem þarf að skila. Skila þarf inn öllum gögnum og framboðsyfirlýsingu útprentuðum og undirrituðum í frumriti til kjörstjórnar fyrir lok framboðsfrests. Kjörstjórn verður við móttöku í Hlíðarsmára 9, 4. hæð, milli kl. 18:00 og 20:00 þann 12. janúar.

Meðmælum 15–30 flokksfélaga með lögheimili í Kópavogi

Um er að ræða bindandi flokksval fyrir efstu fjögur sæti á framboðslista Samfylkingarinnar í Kópavogi, með svokölluðum paralista, þar sem jafnræði kynja er tryggt í hverjum tveimur sætum. Kosningin fer fram 7. febrúar 2026.

Kjörgengir eru allir félagsmenn í Samfylkingunni sem uppfylla landslög og hafa meðmæli 15–30 félaga.

Allar frekari upplýsingar og leiðbeiningar má finna á:
👉 https://xs.is/kopavogur

Samfylkingin í Kópavogi hefur auglýst eftir framboðum til flokksvals vegna sveitarstjórnarkosninganna 2026. Framboðsfrestur er til kl. 20:00 mánudaginn 12. janúar 2026.

Framboðsfrestur til flokksvals í Kópavogi 

Innviðaráðherra ríkisstjórnarinnar „okkar“ hefur lýst því yfir að hann hyggist „festa í sessi“ flugvöllinn í Vatnsmýrinni. Staða málsins milli borgar og ríkis vísar í allt aðrar áttir ‒ og nú hafa íbúar í grennd við völlinn, báðum megin Fossvogsins, risið upp og krafist úrbóta vegna hávaða og slakra loftgæða.

Ræðum þetta á fundi SffR á laugardaginn frá kl. 13 á Hallveigarstíg 1.

Hjálmar Sveinsson borgarfulltrúi kynnir samninga og stöðu málsins af sjónarhóli Reykjavíkurborgar

Margrét Manda Jónsdóttir, fulltrúi íbúasamtakanna Hljóðmarka, talar um hljóð- og loftmengun frá vellinum.

Mörður Árnason, fyrrverandi alþingismaður, kynnir stefnu Samfylkingarinnar um flugvöllinn frá síðasta landsfundi.

Umræður, fyrirspurnir, kaffi og vöfflur.

Frambjóðendur í flokksvalinu sérstaklega velkomnir.

Samfylkingarfélagið í Reykjavík býður í nýárspartí föstudaginn, 9. janúar í Akóges-salnum, Lágmúla 4.

Þar býður SffR öllum frambjóðendum að koma til móts við grasrótina.

Við byrjum um klukkan 18 og á fjölbreyttri dagskrá verður meðal annars svokallað „hraðstefnumót“ þar sem félögum býðst að setjast niður í nokkurra mínútna rabb við hvern og einn frambjóðanda.

Veitingar verða í bæði fljótandi formi og föstu formi eins og SffR er þekkt fyrir.

Nýarspartý og hraðstefnumót með frambjóðendum

Samfylkingin á Vestfjörðum býður ykkur velkomin á umræðufund um komandi sveitarstjórnarkosningar sem fram fara í maí á næsta ári. Fundurinn verður haldinn í Rögnvaldarsal í Edinsborgarhúsinu fimmtudaginn 8. janúar kl. 20. 

Gestir okkar á fundinum verða Arna Lára Jónsdóttir, fyrrverandi bæjarstjóri Ísafjarðar og núverandi þingmaður og formaður efnahags- og viðskiptanefndar, og Guðmundur Ari Sigurjónsson, fyrrverandi oddviti Samfylkingarinnar á Seltjarnarnesi og stjórnarmaður sambands íslenskra sveitarfélaga á árunum 2018 - 2025 og núverandi þingmaður og þingflokksformaður.

Saman hafa þau áratugalanga reynslu og þekkingu á málefnum sveitarfélaga og verður því einstaklega  áhugavert að ræða við þau um komandi sveitarstjórnarkosningarnar. 

Boðið veður upp á léttar veitingar. 

Boðað er til félagsfundar fimmtudaginn 8. janúar frá kl. 20:00 til 21:30 í Samfylkingarhúsinu í Hafnarfirði á Strandgötu 43.

Efni fundarins er ákvörðun um aðferð við val á framboðslista Samfylkingarinnar í Hafnarfirði í næstu sveitarstjórnarkosningum sem haldnar verða 16. maí á næsta ári.

Kosið verður um tillögu stjórnar Samfylkingarinnar í Hafnarfirði og er tillagan eftirfarandi:

Stjórn Samfylkingarinnar í Hafnarfirði leggur til uppstillingu og að raðað verði á framboðslista af sérkjörinni uppstillingarnefnd. 

Raðað skal frambjóðendum af gagnstæðu kyni í 1. og 2. sætið. Leitast skal við að raða frambjóðendum á víxl eftir kyni, mest má setja frambjóðendur af sama kyni tvö sæti í röð og skulu þá næstu tvö sæti hafa frambjóðendur af öðru kyni. 

Ávallt skal leitast við að á framboðslistum séu frambjóðendur yngri en 35 ára í að minnsta kosti fimmtungi þeirra sæta sem stillt er upp í. 

Frambjóðendur skulu hafa fjölbreyttan bakgrunn og ólíka reynslu og líta skal sérstaklega til nýliðunar á listanum.

Uppstillingarnefnd skiptir með sér verkum. 

Boðað verður til félagsfundar til þess að bera listann upp til samþykktar ekki seinna en laugardaginn 28. febrúar.

Kær kveðja, stjórn Samfylkingarinnar í Hafnarfirði.

Bæjarmálafundur hjá Samfylkingunni í Kópavogi verður haldinn miðvikudaginn 7. janúar kl. 20:00 í Hlíðasmára 9.

Á dagskrá verða helstu mál á dagskrá í bæjarstjórn, nefndum og ráðum bæjarins.

Undirbúningur bæjarstjórnarkosninga og almennt stjórnmálaspjall. 

Fyrsta spjallkaffi ársins hjá Samfylkingunni í Reykjavík 60+ verður á miðvikudaginn 7. janúar kl. 10:00 - 12:00 í sal Samfylkingarinnar, Hallveigarstíg 1, 101 Reykjavík.

Á fundinum munum við skoða kvikmyndina The Invisible Doctrine. The Secret History of Neoliberalism, sem byggð er á samnefndri bók eftir Georger Monbiot og Peter Hutchison.

Hægt er að tilkynna fyrirhugað framboð til kjörstjórnar FSR á netfangið kjorstjorn.xsrvk@gmail.com. Í kjölfar tilkynningar fá frambjóðendur nánari leiðbeiningar og upplýsingar um þau gögn sem þarf að skila. Tekið verður við framboðum rafrænt eða í frumriti. Fyrir þau sem vilja skila inn frumriti verður kjörstjórn með móttöku á Hallveigarstíg 1, 101 Reykjavík milli kl. 10:00 og 12:00 þann 3. janúar 2026.

Stuðningsyfirlýsingu 20-30 meðmælanda með lögheimili í Reykjavík.

Kjörgengir eru allir skráðir félagsmenn í Samfylkingunni sem uppfylla landslög og hafa stuðningsyfirlýsingu 20-30 félagsmanna í Reykjavík.

Kosningarétt hafa allir flokksfélagar Samfylkingarinnar sem eiga lögheimili í Reykjavík og hafa náð 16 ára aldri.

Frambjóðendur eru ekki krafðir um þátttökugjald.

Samfylkingin í Reykjavík auglýsir eftir framboðum til flokksvals vegna sveitarstjórnarkosninganna 2026. Framboðsfrestur er til 12:00 laugardaginn 3. janúar 2026.

Framboðsfrestur til flokksvals í Reykjavík 

Events By samfylkinginthe year2026